10 sentyabr 2013-cü il tarixdə Xocalı rayon təhsil işçilərinin sentyabr konfransı.
10 sentyabr 2013-cü il tarixdə Xocalı rayon
təhsil işçilərinin sentyabr konfransı.
Azərbaycanda Dövlət Müstəqilliyinin bərpa olunmasından keçən iyirmi iki il ərzində ümumilli liderimiz H.Əliyevin bütün sahələrdə müəyyənləşdirdiyi uğurlu strategiya - sabitlik, stabillik, əmin-amanlıq nəticəsində təhsilin humanistləşdirilməsi, demokratikləşdirilməsi, təhsil müəssisələrinin müstəqilliyinin artırılması, maddi- texniki bazalarının müasirləşdirilməsi, təhsildə milli zəminin gücləndirilməsi, onun dünya standartlarına uyğunluğu və digər bu kimi aktual məsələlərin təhsil sahəsində dövlət siyasətinin əsas prinsipləri kimi təsbit edilməsi ölkəmizdə təhsil quruculuğunun yeni istiqamətlərinin müəyyənləşdirilməsində müstəsna rol oynadı. Bu illər ərzində demokratik dəyərləri özündə əks etdirən çoxsaylı tədbirlərin keçirilməsi, inkişaf etmiş ölkələrin təhsil sahəsindəki təcrübələrinin öyrənilməsi, söz və şəxsiyyət azadlığına geniş meydan verilməsi Azərbaycan təhsilinin inkişafına, dünya təhsilinə inteqrasiyasına geniş imkanlar açmışdır. Təhsilin humanistləşdirilməsi ilə bağlı ideyaların əməli işdə fəal tətbiqi təhsil işçilərində yeni pedaqoji təfəkkürün formalaşdırılmasına gətirib çıxarmışdır. Təhsildə olan bu cür inkişaf əsasən təhsilin mahiyyət və məqsədinə, onun cəmiyyətdəki roluna yeni baxışların formalaşması ilə müşayət olunmuşdur. Nəticədə yaddaş və hafizəyə əsaslanan təhsil öz yerini təfəkkürə və bacarıqlara əsaslanan təhsilə vermiş, son illərdə tətbiq olunan nəticəyönümlü , şəxsiyyətyönümlü təhsil əldə olunmuşdur.
Ölkəmizdə bütün sahələrdə olduğu kimi təhsil sahəsində də olan yuxarıda göstərilən bu irəliləyişlərə, inkişafa təhsili ən gərəkli sahə hesab edən ümummilli liderimiz Heydər Əliyevin apardığı və bu gün də möhtərəm Prezidentimiz İlham Əliyev cənabları tərəfindən davam etdirilən uğurlu siyasət nəticəsində nail olunmuşdur.”Neft kapitalını insan kapitalına çevirməliyik” vəzifəsini qarşıya qoyan İlham Əliyev cənablarının bütün sahələrdə olduğu kimi təhsil sahəsində apardığı uğurlu siyasət nəticəsində Azərbaycan təhsili dünya təhsilinə inteqrasiya etmişdir. 2003-cü illə müqayisədə 2013-cü ildə ölkəmizin dövlət büdcəsi 13 dəfə , minimum əmək haqqı 17 dəfə, dövlət büdcəsinin tərkibində təhsilə ayrılan ümumi xərclər 8,5 dəfə, təhsilin maliyyələşdirilməsi və investisiya qoyuluşu 46 dəfə, təhsil işçilərinin orta aylıq əmək haqqı 7 dəfə artmışdır. 2003-cü ildən sonra təhsil sahəsində həyata keçirilən inkişaf yönümlü dövlət proqram və layihələrin sayı 23-dür. 2003-2013-cü illərdə ölkə üzrə 2500-ə yaxın yeni məktəb və əlavə korpuslar tikilmişdir. Təhsil müəssisələrinin maddi-texniki bazası gücləndirilmiş, istilik sistemi yenidən qurulmuş, təhsil sisteminin informasiyalaşdırılması proqramı respublikanın bütün təhsil müəssisələrində uğurla başa çatdırılmışdır. Respublikanın ümumtəhsil məktəbləri üzrə hər iyirmi şagirdə bir kompüter düşür. Bizim təhsil müəssisələrimizdə hal-hazırda 59 kompüter vardır. Bu da hər 23 nəfər şagirdə 1 kompüter deməkdir. 2003-cü ildən etibarən respublika üzrə I-XI sinif şagirdlərinin pulsuz dərsliklərlə təminatı 100% olmuşdur. 2005-ci ildən indiyə qədər respublika məktəblərinin kadrlarla təminatı proqramı uğurla icra olunmuşdur. Bu illər ərzində 7300 nəfər gənc kadr həvəsləndirmə tədbirləri, əlavə güzəştlər tətbiq olunmaqla kadr ehtiyacı olan məktəblərdə əmək fəliyyətinə başlamışlar. Bu illər ərzində Xocalı rayonu üzrə bu kateqoriyadan olan 22 nəfər müəllim rayonumuzun təhsil müəssisələrində əmək fəaliyyətinə başlamışdır. 2004 – 2013-cü illərdə 600-dən çox bal toplayan abituriyentlərin dinamikası artımla inkişaf etmişdir. Son altı il ərzində Xocalı rayonu üzrə ali məktəblərə qəbul olanlardan 7 nəfəri qəbul imtahanlarında 600-dən yuxarı bal toplamışdır, onlardan 4 nəfəri Prezident təqaüdçüləri olmuşdur.
Məcburi köçkünlük şəraitində fəaliyyətinə baxmayaraq respublika təhsilində əldə olunmuş uğurlar Xocalı təhsilinə də sirayət etmişdir.
Məlumat üçün bildiririk ki, 2012-2013-cü tədris ilinin əvvəlindən etibarən Xocalı RTŞ tabeliyində 12 tam orta, 1 ibtidai məktəb və 1 UYM Xocalı rayon əhalisinin daha çox kompakt şəkildə məskunlaşdığı 7 bölgədə (Bakı ş, Gəncə ş, Bərdə ş, Şəki ş, Hacıkənd qəsəbəsi, Oğuz rayonu, Goranboy rayonu) fəaliyyət göstərir. Bu təhsil müəssisələrindən altısı (Xocalı şəhər 1 saylı, 3 saylı, 4 saylı, 5 saylı, Meşəli, Cəmilli kənd tam orta məktəbləri ) “Qaçqın və Məcburi Köçkünlərin yaşayış şəraitinin yaxşılaşdırılması və məşğulluğunun artırılması” Dövlət Proqramlarına uyğun olaraq inşa oluinmuş yeni müasir tipli məktəb binalarında fəaliyyət göstərirlər. Bakı şəhəri Sabunçu rayonu Pirşağı qəsəbəsində keçmiş istirahət düşərgəsi üçün nəzərdə tutulmuş fin evlərində fəaliyyət göstərən Xocalı şəhər 2 saylı tam orta məktəb üçün “AKKORD” şirkətlər qrupu tərəfindən 8 otaqdan ibarət 75 şagird yerlik yardımçı bina tikilmiş və 2012-ci ilin mart ayında müəllim və şagirdlərimizin istifadəsinə verilmişdir.
Xocalı şəhər 1 saylı tam orta məktəbin direktoru Vidadi Rəhimovun təşəbbüsü ilə Danimarka Qaçqınlar Cəmiyyəti və Xocalı şəhər 1 saylı tam orta məktəb arasında bir sıra layihələr həyata keçirilmiş, Xocalı şəhər 1 saylı tam orta məktəbə bir sıra idman avadanlıqları, tədris ləvazimatları verilmişdir.
2012-2013-cü tədris ilinin əvvəlində rayonumuzun ümumtəhsil məktəblərində 144 sinif komplektində 1375 nəfər şagirdin təlim-tərbiyəsi ilə 272 nəfər müəllim məşğul olmuşdur. Tədris ili ərzində 48 nəfər şagird respublikanın məktəblərinə getmiş, 27 nəfər respublika məktəblərindən rayonumuzun məktəblərinə gəlmişlər. 15 iyul 2013-cü il vəziyyətinə məktəblərimizdə 1277 nəfər şagird yuxarı sinfə keçmiş, 1 nəfər sinifdə təkrar saxlanmışdır.
Rayonda fəaliyyət göstərən 3 məktəbəqədər təhsil müəssisəsində həyata keçirilən pedaqoji proses RTŞ-nin diqqət mərkəzində saxlanılır, bağça işçilərinə lazımi metodik tövsiyələr verilir.
2012-2013-cü dərs ilinin sonunda respublikanın, eləcə də rayonumuzun ümumtəhsil məktəblərinin IX və XI siniflərində 2 fənn üzrə- ana dili və riyaziyyat fənnlərindən mərkəzləşdirilmiş qaydada cavab kartı tətbiq edilməklə TQDK tərəfindən keçirilmiş buraxılış imtahanlarına hazırlıq məqsədilə buraxılış imtahanları modelinə uyğun suallar əsasında sınaq imtahanlarının keçirilməsi bir vəzifə olaraq RTŞ əməkdaşlarına və məktəb direktorlarına tapşırılmışdır. 2012-2013-cü tədris ili ərzində RTŞ əməkdaşları, məktəb rəhbərliyi və fənn müəllimləri tərəfindən mütəmadi olaraq Xocalı rayon ümumtəhsil məktəblərinin IX və XI siniflərində buraxılış imtahanı modelinə uyğun suallar əsasında sınaq yoxlamaları keçirilmiş, sınaq yoxlamalarının nəticələri məktəb direktorları və fənn müəllimləri ilə birgə müzakirə olunmuş, çatışmazlıqların aradan qaldırılması istiqamətində müvafiq tapşırıqlar verilmişdir.
2012-2013-cü tədris ilinin əvvəlində rayonun ümumtəhsil məktəblərinin IX sinifləri üzrə 128 nəfər şagird təhsil almışdır. Dərs ilinin sonunda IX siniflər üzrə 126 nəfər şagird buraxılış imtahanlarında iştirak etmişdir. Rayonun təhsil müəssisələrinin IX sinifləri üzrə mənimsəmə faizi 67 faiz olmuşdur.
Buraxılış imtahanlarının qiymətləndirmə qaydalarına edilmiş dəyişikliyə uyğun olaraq rayonun ümumtəhsil məktəblərinin IX siniflərini bitirən şagirdlərin illik qiymətləri əsasında onların hamısının yekun qiyməti müvəffəq olmuşdur. Bu şagirdlərə 118 ədəd adi nümunəli, 8 ədəd fərqlənmə şəhadətnaməsi paylanmışdır.
2012-2013-cü tədris ilinin əvvəlində rayonun ümumtəhsil məktəblərinin XI sinifləri üzrə 74 nəfər (əlavə olaraq 1 nəfər xəstə şagird evdə fərdi təhsilə cəlb olunmuşdur) şagird təhsil almışdır. Dərs ilinin sonunda XI siniflər üzrə 75 nəfər şagird buraxılış imtahanlarında iştirak etmişdir. Evdə fərdi təhsilə cəlb olunmuş 1 nəfər xəstə şagird məktəb pedaqoji şurasının qərarı ilə imtahandan azad olunmuşdur. Rayonun təhsil müəssisələrinin XI sinifləri üzrə mənimsəmə faizi 80 faiz olmuşdur.
Rayonun ümumtəhsil məktəblərinin XI siniflərini bitirən şagirdlərin illik qiymətləri əsasında onların hamısının yekun qiyməti müvəffəq olmuşdur. Bu şagirdlərə 76 ədəd adi nümunəli attestat (75 ədədi ümumi təhsili bitirənlərə, 1 ədədi isə fərdi təhsili bitirənlərə) paylanmışdır.
2012-2013-cü tədris ilinin sonunda rayonun təhsil müəssisələrini bitirmiş məzunlar ali və orta ixtisas təhsili müəssisələrinə aşağıdakı qaydada qəbul olmuşlar.
S/s Məktəblər Məzunların sayı Sənəd verənlər Qəbul olanlar Əvvəlki illərin məzunlarından qəbul olanlar
Ali məktəb Orta ixtisas məktəbi
1 Xocalı şəhər 1 saylı tam orta məktəb 11 8 5 1(ötən ilki məzun) 1
2 Xocalı şəhər 2 saylı tam orta məktəb 7 7 7 1 (ötən ilki məzun)
3 Xocalı şəhər 3 saylı tam orta məktəb 8 6 4 - 1
4 Xocalı şəhər 4 saylı tam orta məktəb 14 12 3 2 1
5 Xocalı şəhər 5 saylı tam orta məktəb 3 - - -
6 Kərkicahan qəsəbəs tam orta məktəb 11 9 1 -
7 Kosalar kənd tam orta məktəb 6 6 4 1
8 Başkənd kənd tam orta məktəb 2 2 - 2
9 Yaloba kənd tam orta məktəb 3 3 1 - 1
10 Meşəli kənd tam orta məktəb 6 3 - - 1
11 Cəmilli kənd tam orta məktəb 2 - - - 2
12 Qaragav kənd tam orta məktəb 2 2 1 1
C Ə M İ : 75 58 26nəfər (35%) 8 7
Xocalı rayon Kosalar kənd tam orta məktəbin məzunu Nəsibova Əfsanə Elçin qızı 578 balla Bakı Dövlət Universitetinin hüquqşünaslıq fakültəsinə, Xocalı şəhər 3 saylı tam orta məktəbin məzunu Cəfərov Saleh Taryel oğlu 463 balla Azərbaycan Dillər Universitetinin jurnalistika fakültəsinə, Nəcəfova Günay Tapdıq qızı 464 balla Azərbaycan Dövlət Pedaqoji Universitetinin dil-ədəbiyyat fakültəsinə, Xocalı şəhər 2 saylı tam orta məktəbin məzunu Abdullazadə Şəfiqə Əli qızı 445 balla Bakı Dövlət Universitetinin ibtidai təhsilin pedaqogikası və metodikası fakültəsinə, Həsənəliyeva Şahnaz Ədalət qızı 407 balla İqtisad Universitetinin maliyyə işi fakultəsinə qəbul olmuşlar.
Bütün çətinliklərə baxmayaraq məktəblərimizin pedaqoji kollektivləri, eləcə də RTŞ-nin idarə aparatı kollektivi , rayon İcra Hakimiyyətinin , Təhsil Nazirliyinin və yerlərdə İcra nümayəndələrinin yaxından köməkliyi və qayğısı ilə üzərlərinə düşən vəzifələrin öhdəsindən layiqincə gəlmiş, gənc nəslin təlim-tərbiyəsində öz qüvvələrini əsirgəməmişlər.
Yerli yaşayış məntəqələrindən uzaqda yerləşən ərazilərdə məskunlaşmış az sayda olan Xocalı köçkün ailələrinin məktəbyaşlı uşaqlarının, eləcə də zəruri ehtiyacın çox olduğu yerlərdə məktəbyaşlı uşaqların təhsilə cəlbi üçün Xocalı rayon İcra Hakimiyyəti Başçısının köməkliyi ilə müvafiq təhsil şəraiti yaradılmışdır. Belə ki, Bərdə şəhəri peşə liseyinin yataqxanasında məskunlaşmış ibtidai sinif yaşlı Xocalı uşaqlarının təhsilə cəlb olunması üçün Kosalar kənd ibtidai məktəbi Bərdə şəhərinə köçürülmüşdür. Şəki rayonu “ Muradbulağı” yaşayış məntəqəsində Xocalı şəhər 3 saylı tam orta məktəbin filialı, Oğuz rayonu keçmiş Pioner düşərgəsi ərazisində Qaragav kənd tam orta məktəbin filialının fəaliyyəti nəticəsində bu ərazilərdə olan uşaqlar təhsilə cəlb olunmuşlar.
Bütün dərs ilində məktəblərimiz bina şəraiti və tədris üçün lazım olan ilkin avadanlıqlarla (parta, yazı taxtası, müəllim stolu və stulları, kitab rəfləri, dərsliklər və s.) əsasən təmin olunmuşlar. Məktəblərimizdə olan dərslik fondunun və 2012-ci ildə Təhsil Nazirliyindən alınan 64 adda 2286 ədəd dərsliyin hesabına I –XI sinif şagirdlərimizin pulsuz dərsliklərlə təminatı 100% olmuşdur. Ötən dərs ilində I-V siniflərdə dərs deyən və kursdan keçməsi zəruri olan müəllimlərimiz təlim kurslarında iştirak etmişlər. I-V siniflərdə dərslər yeni tərtib olunmuş fənn kurikulumları əsasında tədris olunmuşdur. Təhsil sahəsində yeni fənn kurikulumlarının tətbiqi təhsilin məzmununda köklü dəyişikliklər yaratmaqdadır. Yeni tədris ilində respublikanın təhsil müəssisələrində olduğu kimi rayonumuzun təhsil müəssisələrində də I-VI siniflər üzrə dərslər yeni fənn kurikulumları əsasında tədris olunacaqdır. 2013-2014-cü dərs ilində VI siniflərdə dərs deyəcək müəllimlərimiz 10 günlük təlim kurslarında iştirak etmişlər. Uzun illər məktəblərimizdə bədii ədəbiyyata olan ehtiyac 2005-2008-ci illərdə Ölkə Başçısı İlham Əliyev cənablarının tapşırığı nəticəsində tam ödənilmişdir. Lakin məktəblərimizdə kifayət qədər bədii ədəbiyyat olduğu halda məktəblərimizin bəzilərində kitabxana işinin təşkili heç də yaxşı vəziyyətdə deyil. Yeni tədris ilində məktəb kitabxanalarında dərsliklərin qorunması və oxu işinin təşkili diqqət mərkəzində saxlanılmalıdır.
2012-2013-cü dərs ilində Təhsil Nazirinin əmrinə uyğun olaraq Xocalı şəhər 1 saylı, 4 saylı , Yaloba , Meşəli kənd tam orta məktəblərin II və III siniflərində pilot olaraq şahmat fənninin tədrisinə başlanılmışdır. Yeni dərs ilində isə yuxarıda adları göstərilən məktəblərin II,III,IV siniflərində, eləcə də Kosalar və Başkənd kənd tam orta məktəblərinin II siniflərində şahmat fəninin tədrisi təşkil olunacaqdır.
15 sentyabr 2012-ci il tarixdə məktəblərimizin I sinif şagirdlərinə H.Əliyev Fondu tərəfindən verilən məktəbli çanta dəstləri və məktəbli kostyumları paylanmışdır.
Yerli büdcə vəsaiti hesabına tələbata uyğun olaraq lazımi inventar, avadanlıqlar, odun yanacağı, elektrik sobaları və s. alınaraq məktəblərə çatdırılmış, 2012-ci ilin yay dövründə 4500 manatlıq cari təmir xərci hesabına rayonun təhsil müəssisələrinin hamısında təmir işləri aparılmışdır.
2012-ci ildə yerli büdcə vəsaiti hesabına fizika və kimya laboratoriya avadanlıqlarının bir hissəsi alınaraq Xocalı şəhər 1 saylı və 4 saylı tam orta məktəblərinə verilmişdir. Göstərilən məktəblərin fizika və kimya müəllimləri bu avadanlıqlardan tədrisdə istifadə edirlər. Gələcəkdə büdcə xərcləri daxilində çatışmayan digər avadanlıqların alınıb məktəblərə verilməsi nəzərdə tutulmuşdur.
Bildiyimiz kimi Azərbaycan Respublikası Prezidentinin Sərəncamı ilə 2012-ci il ölkəmizdə “İnformasiya kommunikasiya texnologiyaları ili” elan olunmuşdur. İl çərçivəsində məktəblilər arasında “Mənim kompüter sahəsindəki bilgilərim” devizi altında müsabiqə keçirilmişdir. Təhsil Nazirinin əmrinə uyğun olaraq “Bir şagird- bir kompüter” layihəsində iştirak etmək üçün vaxtında məktəblərə ətraflı məlumat verilmişdir. Rayonun ümumtəhsil məktəblərində informatika fənnindən açıq dərslər təşkil olunmuşdur . Xocalı rayon Ə.Cavadov adına Cəmilli kənd tam orta məktəbində informatika fənnindən təşkil olunmuş açıq dərsdə bir neçə məktəbin fənn müəllimləri, rayon İcra Hakimiyyəti Başçısının müavini Göyüş Həsənov və bu şöbənin baş məsləhətçisi Aynurə Abışova iştirak etmişlər.
Xocalı şəhər 1 saylı tam orta məktəbin komandası “Şahin” hərbi idman oyunlarının zona mərhələsində , Xocalı şəhər 4 saylı tam orta məktəbin komandası “Cəsurlar” yarışının zona mərhələsində fəal iştirak etmişlər. Xocalı şəhər 4 saylı tam orta məktəbin “Cəsurlar”komandası zona yarışında III yerə layiq görülmüşdür. İl çərçivəsində rayonumuzun məktəbliləri bir sıra idman yarışlarında fəallıq göstərmişlər. Bu işdə Xocalı rayon Gənclər və İdman İdarəsinin gördüyü işlər xüsusilə təqdirə layiqdir.
“Xüsusi istedada malik uşaqların (gənclərin ) yaradıcılıq potensialının inkişafı ” haqqında Azərbaycan Respublikası Prezidentinin 17 aprel 2006-cı il tarixli 1414 saylı sərəncamına uyğun olaraq RTŞ-də istedadlı uşaqların istedad bankı yaradılmış, həmin uşaqların üzə çıxarılması və istedadlarının inkişafı istiqamətində mühüm tədbirlər həyata keçirilmişdir.
Rayonun ümumtəhsil məktəblərinin şagirdləri fənn olimpiadalarının rayon və respublika turunda iştirak etmişlər. Ötən dərs ilində 2 nəfər şagirdimiz- Xocalı şəhər 1 saylı tam orta məktəbin şagirdi Həsənli Fidan Mehdi qızı, Başkənd kənd tam orta məktəbin şagirdi Hümbətova Çinarə Fəxri qızı olimpiadaların respublika turuna vəsiqə qazanmış və iştirak etmişlər.
Bütün tarixi günlər, əlamətdar bayramlar məktəblərimizdə geniş şəkildə keçirilmişdir.
Azərbaycan Respublikası Təhsil Nazirinin əmri ilə təsdiq olunmuş tədbirlər planına uyğun olaraq görkəmli yazıçı və şairlərin yubileyləri geniş şəkildə qeyd edilmişdir.
Rayonun ümumtəhsil məktəblərinin şagirdləri arasında “Nizami hikmətinin işığında” mövzusunda inşa müsabiqəsinin məktəb, rayon mərhələsi keçirilmişdir. 06 noyabr 2012-ci il tarixdə Goranboy rayonu Aşağı Ağcakənd qəsəbəsində rayon İcra Hakimiyyətinin təşkilatçılığı Nizami Gəncəvinin 870 illik yubileyinə həsr olunmuş elmi-praktik konfrans keçirilmişdir.22 noyabr 2012-ci il tarixdə rayonun VII-XI sinif şagirdləri arasında N.Gəncəvinin 870 illik yubileyi münasibətilə şeir müsabiqəsi keçirilmiş, rayonun məktəb şagirdlərinin N.Gəncəvinin məqbərəsinə ekskursiyaları təşkil olunmuşdur.
M.Ə.Sabirin 150 illik yubileyi münasibətilə rayonun ümumtəhsil məktəblərinin şagirdləri arasında “Böyük Azərbaycan şairi M.Ə.Sabir haqqında düşüncələrim” mövzusunda inşa müsabiqəsinin məktəb və rayon mərhələsi keçirilmiş, rayon mərhələsinin qalibi Səlimov Fərid Fərhad oğlunun inşa yazısı Təhsil Nazirliyinə təqdim olunmuş və həvəsləndirici yerə layiq görülmüşdür.
30 may 2013-cü il tarixdə rayonun 9 tam orta məktəbinin şagirdləri arasında “İnsan hüquqlarını qoruyaq” devizi altında asfalt üzərində rəsm müsabiqəsi keçirilmişdir.
21 sentyabr “Beynəlxalq sülh günü” münasibəti sülh aylığı çərçivəsində Xocalı rayonunun prokuroru və prokurorluğun əməkdaşları dəfələrlə müəllim və şagirdlər qarşısında maarifləndirici məruzələr etmişlər.
14 iyun 2013-cü il tarixdə “İnsan hüquqları aylığı” çərçivəsində Goranboy rayonu Aşağı Ağcakənd qəsəbəsində 5 məktəbin şagirdləri arasında “kross” yarışı keçirilmişdir.
Azərbaycan Respublikası Təhsil Nazirliyi və Fövqaladə Hallar Nazirliyinin birgə tədbirlər planına uyğun olaraq Xocalı şəhər 4 saylı tam orta məktəbin komandası “Gənc xilasedici və yanğınsöndürən ” yarışının Yevlax şəhərində keçirilən zona mərhələsində fəal iştirak etmişdir. Bu yarışa hazırlıqda Fövqaladə Hallar Nazirliyinin Xocalı rayon şöbəsinin əməkdaşları bizə yaxından köməklik etmişdir. Komandanın hazırlanmasında Xocalı şəhər 4 saylı tam orta məktəbin Gənclərin çağırışaqədərki hazırlıq rəhbəri Quliyev Firuz Yunis oğlu fəallıq göstərmişdir.
Xocalı rayon Gənclər və İdman İdarəsinin təşkilatçılığı ilə 2012-ci ilin və 2013-cü ilin yay dövründə bir qrup şagirdin Şəki , Nabran və Göy-göl rayonlarında yay istirahətləri təşkil olunmuşdur.
Ümumilli lider H.Əliyevin anadan olmasının 90 illik yubileyi münasibətilə rayonun ümumtəhsil məktəblərinin şagirdləri arasında inşa yazı müsabiqəsi keçirilmişdir. İnşa müsabiqəsinin Respublika mərhələsində iştirak edən Xocalı şəhər 4 saylı tam orta məktəbinin VIII sinif şagirdi Bəhramlı İradə Fəxri qızı III yerə layiq görülmüşdür.
2013-cü ilin may ayında Təhsil Şöbəsi və rayon Gənclər və İdman İdarəsinin birgə təşkilatçılığı ilə məktəblilər arasında futbol və şən startlar idman yarışı keçirilmişdir.
Təhsil Nazirliyinin və Həmkarlar İttifaqları Konfederasiyasının birgə tədbirlər planına uyğun olaraq ulu öndərin yubileyi münasibətilə müəllimlər arasında şahmat yarışı keçirilmiş, rayon mərhələsinin qalibi Hümbətov Elsevər Ağamir oğlu respublika turunda iştirak etmişdir.
Son illərdə Ölkə Başçısının sərəncamı ilə minimum aylıq əmək haqqının və təhsil işçilərinin əmək haqlarının artırılması rayon təhsil işçiləri tərəfindən Ölkə Başçısının təhsil işçilərinə diqqət və qayğısının təzahürü kimi dəyərləndirilmişdir.
Qarşıdan yeni 2013-2014-cü dərs ili gəlir. Xüsusi istedada malik uşaqların vaxtından əvvəl I sinfə qəbulunu həyata keçirmək üçün Xocalı RTŞ-nin 22 iyul 2013-cü il tarixli əmri ilə komissiya yaradılmışdır. Rayonun məktəbləri respublikanın 7 bölgəsində fəaliyyət göstərdiyi üçün komissiya üzvləri səyyari şəkildə uşaqların bilik yoxlanılmasını təşkil etmişdir. Komissiyaya 27 valideynin ərizəsi daxil olmuş, biliyi yoxlanılan uşaqlardan 23 nəfərinin I sinfə qəbulu barədə qərar qəbul olunmuş və müvafiq qaydada rəsmləşdirilmişdir.
Yeni dərs ilinə hazırlıqla əlaqədar Təhsil Nazirliyinin Maddi-texniki Təchizat İdarəsindən məktəb sənədləri alınmışdır. Məktəblərdəki dərslik fondunun və bu il Təhsil Nazirliyindən alınmış 31 adda 2022 ədəd dərsliyin hesabına I-XI sinif şagirdlərimizin hamısı 100% pulsuz dərsliklərlə təmin olunacaqdır. 2013-2014-cü dərs ilində I-V siniflərlə bərabər VI siniflərimizdə də dərslər yeni fənn kurikulumları əsasında tədris olunacaqdır. 2013-2014-cü dərs ilində VI siniflərdə dərs deyəcək müəllimlərimiz təlim kurslarından keçmişlər.
I sinif şagirdləri üçün H.Əliyev Fondunun verdiyi məktəbli çanta dəstləri və I-IV sinif şagirdləri üçün Dövlət Qaçqınkomun verdiyi məktəbli kostyumları məktəblərə çatdırılmış və 16 sentyabr 2013-cü il tarixdə şagirdlərə paylanacaqdır.
Yeni dərs ilinə hazırlıqla bağlı yerli büdcə vəsaiti hesabına rayonun məktəblərinin hamısında 5000 manatlıq cari təmir işləri görülmüşdür.
Məktəblərimizin hamısında yeni dərs ilinə hazırlıqla əlaqədar müvafiq tədbirlər həyata keçirilmiş və yeni dərs ilinə hazırlıq işləri başa çatdırılmışdır.
Qarşıdan yeni 2013-2014-cü tədris ili gəlir. Bu il ümumtəhsil məktəblərimizdə fəal təlim metodlarının tətbiqi üzrə səmərəli iş sistemi yaradılmalı, bu sahədə respublikada toplanmış təcrübə öyrənilməli, fəal təlim metodları ilə fəaliyyətin hər bir müəllim tərəfindən əsas vəzifə, normativ kimi qəbul edilməsinə nail olunmalıdır.
Bu il oktyabrın 9-da ölkəmiz üçün taleyüklü məsələ-prezident seçkiləri keçiriləcəkdir. Xalqımızın 1993-cü ildən sonrakı seçimlərində yanılmadıqları göz qabağındadır. Rayonumuzun təhsil işçiləri də ziyalı olaraq oktyabrın 9-da öz vətəndaşlıq borcunu yerinə yetirməlidirlər.
Ölkəmizdə aparılan uğurlu və məqsədyönlü siyasət nəticəsində son illərdə Azərbaycan təhsilində, eləcə də Xocalı təhsilində nəzərəçarpan irəliləyişlər olmuşdur. Biz Xocalı rayonunun təhsil işçiləri Azərbaycan Respublikasının Təhsil Nazirliyini, Xocalı rayon İcra Hakimiyyətinin Başçısını və eləcə də ictimaiyyətimizi əmin edirik ki, rayonumuzun təhsil işçiləri bundan sonra da heç bir çətinlikdən qorxmadan gerilikləri , nöqsanları vaxtında aradan qaldıracaq, öz işlərimizi günün tələbləri səviyyəsində, gənc nəslin təlim-tərbiyəsi işini müstəqil respublikamızın inkişafına uyğun şəkildə , təhsilimizin himyədarı olmuş ümummilli liderimiz H.Əliyevin ideyalarına uyğun şəkildə quracaq, yeni dərs ilində qarşıya qoyulan vəzifələr diqqətlə həyata keçiriləcəkdir.
