“Erkən nikahlara qarşı birlikdə mübarizə aparaq” mövzusunda maarifləndirici tədbir keçirilib
29 oktyabr 2024 | 16:58
Xocalı rayon İcra Hakimiyyətinin təşkilatçılığı ilə “Uşaq Hüquqları Aylığı” çərçivəsində “Erkən nikahlara qarşı birlikdə mübarizə aparaq” mövzusunda maarifləndirici tədbir keçirilib.
Goranboy şəhər 4 saylı tam orta məktəbin akt zalında keçirilən tədbir 29 oktyabr 2024-cü il tarixdə baş tutub.
Tədbirdə Rayon İcra Hakimiyyəti Başçısının müavini Lamiyə Qarayeva, rayon mərkəzi xəstənasının baş həkimi Aqil Məmmədov, Xocalı rayon Polis Şöbəsinin əməkdaşı Babək Quliyev və Goranboy rayon Təhsil şöbəsinin əməkdaşı Bəxtiyar Quliyev erkən nikahın uşaq hüquqlarını pozması barədə maarifləndirmə işinin aparılmasının vacibliyini vurğulayıblar. Bildirilib ki, nikah yaşından az olan yeniyetmələrin ailə qurmağa təhrik edilməsi qadın və uşaq hüquqlarının kobud şəkildə pozulması deməkdir. Tarixin bütün dövrlərində nümunəvi olan Azərbaycan ailəsində erkən nikaha yol verilməsi qəbuledilməzdir və məsuliyyətə səbəb olur. Eyni zamanda erkən nikah qız uşaqlarının təhsil almaq hüququnun əlindən alınması deməkdir və uşaqların təhsildən yayınmalarının qarşısının alınması istiqamətində dövlətimiz tərəfindən müvafiq tədbirlər görülür.
80 nəfərin yararlandığı tədbirdə müəllim və şagirdlərlə yanaşı valideynlər də iştirak ediblər. Sonda maarifləndirici videoçarx nümayiş etdirilib.
Keçidlər
