Xocalı rayonundan olan Vətən müharibəsi şəhidlərinin məzarları ziyarət edildi
28 sentyabr 2022 | 10:44
Azərbaycanın ərazi bütövlüyü uğrunda döyüşlərdə şəhidlik zirvəsinə ucalan qəhrəman Vətən oğullarının məzarları ziyarət edilir, şəhidlərimizin ailələri ilə, eləcə də döyüşlər zamanı yaralanan qazilərlə görüşlər keçirilir, onların problemləri ilə maraqlanılır.
Bu mənada Xocalı rayon İcra Hakimiyyətinin başçısı Şahmar Usubovun tapşırığına əsasən sentyabrın 28-də Xocalı rayon İcra Hakimiyyəti başçısının müavini Lamiyə Qarayeva, rayon icra hakimiyyəti başçısı aparatının Vətən müharibəsi iştirakçıları və şəhid ailələri ilə işin təşkili şöbəsinin məsul şəxsləri, rayonun bir qrup idarə, müəssisə rəhbərləri, ictimai fəallar Ağcabədi şəhər Şəhidlər Xiyabanında dəfn edilmiş Ordumuzun əks-kəşfiyyat bölüyünün müddətdən artıq həqiqi hərbi xidmət qulluqçusu Miriyev Sənan Arif oğlunun, Ağcabədi rayon Sarıcalı kənd qəbiristanlığında dəfn edilmiş kəşfiyyatçı Mustafazadə Ceyhun Şükür oğlunun, Bərdə şəhərinin Şəhidlər Xiyabanında dəfn edilmiş Azərbaycan Silahlı Qüvvələrinin müddətdən artıq həqiqi hərbi xidmət qulluqçusu Nəsirov Xəqani Kamran oğlunun, Bərdə rayonu Şirvanlı kənd qəbiristanlığında dəfn edilmiş Dövlət Sərhəd xidmətinin kəşfiyyatçı giziri Ramazanlı Əlizamin Umud oğlunun məzarlarını ziyarət edərək, şəhidlərimizin ruhuna dərin ehtiram əlaməti olaraq məzarları üstünə gül dəstələri düzdülər. Şəhidlərimizin ruhuna dualar oxudular.
27 sentyabr tarixdə Talış və Suqovuşan istiqamətində gedən döyüşlərdə şəhadət şərbətini içərək əbədiyyətə qovuşmuş və 28 sentyabr tarixdə dəfn edilmiş Miriyev Sənan Arif oğlunun məzarı önündə çıxış edən Lamiyə Qarayeva Vətən müharibəsində qəhrəman oğulların hesabına şanlı qələbə əldə etdiyimizi dedi. Bildirdi ki, şəhidlərimiz bizə qələbəni, torpaqlarımızın azadlığını bəxş etdi. Xalqımız dəmir yumruq kimi birləşdi və Ordumuza, Ali Baş Komandanımıza dəstək oldu. Sənan Miriyev də adını şanlı zəfər tarixinə yazdıran qəhrəman Vətən oğullarından biridir. Bizim heç bir zaman şəhidlərimizi unutmağa haqqımız yoxdur. Şəhidlərimizin hünəri, fədakarlığı sayəsində 30 il ərzində düşmən tapdağı altında inildəyən torpaqlarımızı işğaldan azad etdik.
Qeyd edək ki, Miriyev Sənan Arif oğlu 1998-ci il mart ayının 1-də Beyləqan rayonunun Allahyarlı kəndində anadan olub. Xocalı şəhər sakinidir. Xocalı şəhər 4 saylı orta məktəbin məzunu olub. Sənan 2016-cı ilin aprel ayında hərbi xidmətə çağırılmışdır. O, Dövlət Sərhəd Xidmətində çavuş kimi hərbi xidməti başa vurduqdan sonra ehtiyyata buraxılmışdır. 2020-ci il sentyabrın əvvəlində könüllü olaraq ordu sıralarına ərizə verdikdən sonra Azərbaycan Ordusunun əks-kəşfiyyat bölüyünə yazılaraq müddətdən artıq həqiqi hərbi xidmətə başlamışdır. 27 sentyabr tarixdə Talış və Suqovuşan istiqamətində gedən döyüşlərdə şəhidlik zirvəsinə ucalan Sənan Miriyev Ağcabədi rayonu Şəhidlər Xiyabanında dəfn edilib.
Azərbaycan Respublikası Prezidentinin müvafiq Sərəncamlarına əsasən, Miriyev Sənan Arif oğlu "Vətən uğrunda", "Cəsur döyüşçü", "Suqovuşanın azad olunmasına görə" medalları ilə təltif edilmişdir.
Məkanı cənnətdir, ruhu şad olsun.
Allah bütün şəhidlərimizə rəhmət eləsin.
Keçidlər
