Xocalı rayonundan olan şəhid torpağa tapşırıldı.

Aprelin 2-də cəbhədə erməni təxribatının qarşısını alarkən qəhrəmancasına şəhid olan Xocalı şəhər sakini, 08.07.1997-ci il təvəllüdlü  əsgər Mehralıyev Sərvan  Natiq oğlu bu gün dəfn olunub. Şəhid doğulub boya-başa çatdığı Ağdam rayonunun Üçoğlan kəndində torpağa tapşırılıb. Onun dəfnində Xocalı rayon İcra hakimiyyətinin başçısı Şahmar Usubovun iştirakı ilə rayonun idarə, müəssisə və təşkilatları, kənd İcra nümayəndəlikləri, ziyalılar, ağsaqqallar, gənclər, məktəblilər və hərbiçilərdən ibarət  5000 nəfərdən çox   rayon sakini, şəhidin  qohumları,dostları iştirak ediblər. Xocalı rayon İcra hakimiyyətinin başçısı Şahmar Usubov   çıxış edərək bildirmişdir  ki, ölkə Prezidenti cənab İlham Əliyev tərəfindən  həyata keçirilən düşünülmüş və  məntiqli siyasət nəticəsində torpaqlarımızı işğaldan azad edəcəyik, qaçqın və məcburi köçkünlər  öz doğma yurd–yuvalarına qayıdacaq və cəzasız qalmış cinayətkarlar layiqli cavablarını alacaqdır.    Sonda rayon rəhbəri erməni qatillərinin qurbanı olan bütün şəhidlərə Tanrıdan rəhmət diləmişdir. İzdihamlı tədbirdə iştirak edən Millət Vəkili Elman Məmmədov, Müdafiə Nazirliyinin və şəhidin qulluq elədiyi “N” saylı hərbi hissənin zabit heyəti, Ağdam Rayon İcra Hakimiyyətinin başçısı Raqub Məmmədov çıxış edərək şəhidin yaxınlarına səbr diləmiş, Silahlı Qüvvələrimiz tərəfindən işğalda olan bütün torpaqlarımızın tezliklə işğaldan azad ediləcəyini bildirmişlər. Daha sonra şəhidin atası Natiq Mehralıyev çıxış edərək övladı şəhid olduğundan qürur duyduğunu bildirmişdir. Dəfn mərasimində  “Şəhidlər ölməz, Vətən bölünməz” şüarı səsləndirilib. Şəhid əsgər yaylım atəşləri altında son mənzilə yola salınıb. Yekunda  Xocalı Rayon İcra Hakimiyyətinin başçısı Şahmar Usubov, hüquq-mühafizə orqanlarının əməkdaşları, idarə müəssisə rəhbərləri, kənd icra nümayəndələri, ziyalılar və rayon ictimaiyyət nümayəndələri şəhidin qəbri  üzərinə tər çiçək dəstələri düzdülər.